क्षेत्री समाज नेपालको एक दिने पश्चिमाञ्चल बन्दको कारण आज बिहानैदेखि पश्चिमाञ्चलका गण्डकी, धौलागिरी र लुम्बिनी अञ्चलको जनजीवन प्रभावित बनेको छ । बन्दका कारण सवारी साधन, उद्योग धन्दा कल कारखाना, शैक्षिक संस्था एवं व्यापारीक प्रतिष्ठानहरु प्रभावित भएका छन् । बन्दकर्ताहरु चोकचोकमा जम्मा भएर प्रदर्शन गरिरहेका छन् । गन्तव्यमा जानका लागि सडकमा निस्किएका सर्वसाधारणहरु अलपत्र परेका छन् ।

बन्दका कारण गुल्मी जिल्लामा पनि वजार, शिक्षण संस्था, कलकारखाना वन्द रहेका छन् भने जिल्लावाट बाहिर छुट्ने र बाहिरवाट जिल्लामा भित्रीने सबारी साधन पनि चल्न सकेका छैनन् । बन्दका कारण सदरमुकाम तम्घास लगायत आसपासको बजार क्षेत्र वन्द रहेपनि क्षेत्र नं को मजुवा, उल्लीखोला, खैरेनी, रुद्रवेणी वजार भने निर्वाध रुपमा खुलेको बताईएको छ । समयमै संविधान जारी गर्नुपर्ने, क्षत्रीहरुलाई आदिवासीमा सुचिकृत गर्नुपर्ने, वर्गिय आधारमा आरक्षणको व्यवस्था गर्नुपर्ने लगायतका ७ बुद्धे माग राख्दै क्षत्रीहरु सडक आन्दोलनमा उत्रिएका हुन् । बैशाख १९ देखि चरणबद्ध आन्दोलनका कार्यक्रमहरु गर्दै आएका क्षत्रीहरुले राज्यले कुनै सुनुवाई नगरेका कारण वाध्य भएर आन्दोलनमा जानुको विकल्प नभएको बताएका छन् । 

बन्दका क्रममा अत्यावश्कीय सवारी साधनहरुलाई छुट दिने तथा जारी कक्षा १२को परिक्षा पनि निवार्ध संचालन गर्न दिने क्षत्री समाज नेपालका केन्द्रिय सदस्य दल वहादुर जिसीले बताउनु भयो । आज विहान ६ बजेवाट शुरु भएको आन्दोलन वेलुका ६ बजे सकिने र आन्दोलन शान्तीपुर्ण हुने जिसीले बताउनु भयो । यसैबीच क्षत्री समाजको बन्दप्रति व्राहमणसमाज नेपालले पनि ऐक्यवद्धता जनाएको छ । 

उता विभिन्न संगठनहरुले आह्वान गरेको बन्दको यस क्षेत्रका संघसंस्थाहरुले फिर्ता लिन आग्रह गरेका छन् । अभिभावक संघ रुपन्देहीका अध्यक्ष लोकनाथ ज्ञवाली र महासचिव प्रकाश खनालले विज्ञप्ती निकालेर बन्दले कसैलाई पनि हित नगर्ने भन्दै विद्यालय क्षेत्रलाई शान्ति क्षेत्र बनाउन माग गरिएको छ । उता बन्द गराउदै हिडेका क्षत्री समाजका पांच जना अगुवाहरु भैरहवामा पक्राउ परेका छन् । आज विहान भैरहवामा बन्द गराउने क्रममा क्षेत्री समाज नेपाल रुपन्देहीका उपाध्यक्ष नाम वहादुर केसी, जिल्ला सहसचिव बिष्णु बराल, सिदार्थनगर अध्यक्ष खिम वहादुर जिसी लगायत पक्राउ परेका हुन् । उनिहरुले जिल्ला प्रहरी कार्यलय रुपन्देहीमा राखेको क्षत्री समाजका जिल्ला अध्यक्ष ओम वहादुर फौजदारले बताउनु भयो । 

उहांले पुर्व घोषित बन्दका क्रममा आफ्ना क्षत्री अगुवाहरुलाइृ पक्राउ गर्नु आपत्तीजनक भएको भन्दै तत्काल विना सर्त रिहा नगरे कडा संर्घषका कार्यक्रम गर्ने चेतावनी दिनु भएको छ ।