नेपाल जलवायु परिवर्तनसम्बन्धी महासन्धिका लागि अल्पविकसित देशहरुको समूहको संयोजकमा चयन भएको छ ।

यसअघि संयोजक गाम्बिया रहेको थियो । एसियाबाट अल्पविकसित देशहरुको समूहको संयोजन गर्न नेपालले पाएको यो पहिलो अवसर हो । यसअघि यस क्षेत्रबाट बङ्गलादेशले मात्र संयोजन गर्ने मौका पाएको वातावरण मन्त्रालयका सचिव कृष्ण ज्ञवालीले जानकारी दिनुभयो । जर्मनीको बोनमा यही जेठ ११ गते सो समूहको बैठकले नेपाललाई संयोजन गर्ने जिम्मेवारी तोकेको थियो । बङ्गलादेशले उम्मेदवारी फिर्ता लिएपछि नेपाल सर्वसम्मतरुपमा समूहको संयोजकमा चयन भएको हो ।

हाल सो समूहमा ४८ देश रहेका छन् । सो समूहले खासगरी जलवायु परिवर्तनबाट परेका समस्यालाई कम गर्न सामूहिकरुपमा नीति निर्माण गरी लागु गर्ने र जलवायु परिवर्तनमा विकसित मुलुकले पारेका असरका विरुद्ध सामूहिकरुपमा सौदाबाजी गर्नेछ ।

संयोजन कार्यलाई थप प्रभावकारी बनाउन वतावरण मन्त्रालयले जलवायु परिवर्तनसम्बन्धी महासन्धि पक्ष देशहरुको सम्मेलन, सहायक सम्मेलन, सहायक अङ्गहरु तथा तदर्थ समूहरुको औपचारिक तथा अनौपचारिक बैठकमा भाग लिनका लागि मुख्य वार्ता टोलीको चयन गरिसकेको छ । रासस