जनार्दन घिमिरे
गुल्मी, २४ असार । अविरल वर्षाको कारण पहिरो जाँदा शुक्रवार रातिदेखि अवरुद्ध वनेको गुल्मीको रिडी—रुद्रवेणी सडक सुचारु हुन नसक्दा त्यस क्षेत्रका हजारौं मानिसहरु यतिवेला समस्यामा परेका छन् । सडक अवरुद्ध भएको दुइदिन सम्म पनि स्थानीय प्रशासन र उपभोक्ता समितिले सडक संचालन गर्नकोलागि खासै चासो नदेखाएका कारण त्यस क्षेत्रमा मानिसहरु थप समस्यामा परेका हुन् ।
सडक सुचारु गर्न कसैले पहल नगरेको स्थानीय उपभोक्ताहरुको गुनासो रहेको छ । कहिले सम्म सडक सुचारु हुन्छ भन्ने विषयमा मानिसहरु अनविज्ञ छन् । तर प्रमुख जिल्ला अधिकारी कविन्द्र नेपालले भने सडक सुचारु गर्नको लागि पहल भईरहेको भन्दै भोली अपरान्हसम्ममा उक्त सडक सुचारु हुने जानकारी दिनु भएको छ । सडक क्षेत्रको धेरै स्थानहरुमा पहिरो खसेका कारण कामदार लगायर सडक सुचारु गर्न समस्या भएकोले डोजरको प्रयोगगरि अवरुद्ध सडक हटाउने तयारी गरेको वताउनु भयो । रुद्रवेणी सडक खण्ड अन्र्तगत ग्वादी गाविस ५ स्थित साँघुरे र अश्लेवा गाविस स्थित कमेरेपानी लगायत एक दर्जन भन्दा वढी स्थानमा सडक माथिवाट पहिरो खसेपछि सडक अवरुद्ध वनेको हो ।
गुल्मी जिल्लामा सवै भन्दा वढी सवारी साधनहरु संचालन हुने उक्त सडक अवरुद्ध वनेपछि वुटवलवाट वामीटक्सार हुँदै वुर्तिवाङ्गसम्म आवत जावत गर्ने सम्पूर्ण सवारी साधनहरु रिडी र रुद्रवेणीमा अलपत्र परेका छन् भने यात्रुहरु भने पैदलै हिडेर गन्तव्यमा पुग्ने गरेका छन् । यसैगरी अविरल वर्षाको कारण सडक विग्रियपछि गुल्मी तम्घास सिमलटारी सडक खण्ड पनि गत तीनदिनदेखि अवरुद्ध वनेको छ । उक्त सडकहरुमा सवारी साधनहरु संचालन हुन नसक्दा सदरमुकाम आवत जावत गर्न मानिसहरु समस्यामा परेका छन् ।