बुटवल, असार २१ रुपन्देही, नवलपरासी र कपिलवस्तुका विभिन्न धार्मिक कार्यक्रममा सहभागी भई पूर्व राजा ज्ञानेन्द्र आज अपराह्न काठमाडौं फर्किएका छन्। आइतबार भैरहवा आएका पूर्व राजा ज्ञानेन्द्र अपराह्न साढे दुई बजे बुद्ध एयरको विमानबाट काठमाडौं फर्केका हुन्। पाँच दिने बसाईमा उनले यस क्षेत्रका एक दर्जन मन्दिरमा पूजाआजा गर्नुका साथै समर्थक र सर्वसाधारणलाई भेटघाट गरेका थिए।
भैरहवाको होटल निर्वाणामा बसेका उनले मंगलबार साँझ पत्रकार भेटघाट गर्दै मुलुकको पछिल्लो राजनैतिक घटनाक्रम बारे असन्तुष्टि जनाएका थिए। जातीय राज्य बनाउने कुराले मुलुकमा विखण्डन ल्याउने भन्दै उनले जनताले अहिले राजसंस्थाको भूमिका खोज्न थालेको बताएका थिए।

शाहले नवलपरासी रुपन्देही र कपिलवस्तुका विभिन्न मन्दिरमा पुगी पूजाआजा गरे। भ्रमणको राम्रो प्रवन्ध गरेको भन्दै स्थानीय स्वागत समितिलाई पूर्व राजाले धन्यवाद दिएका छन्।