पि.एम.मगर
गुल्मी, भदौ १८ । मासु व्यावसायी सघं गुल्मीले आफुखुसी मासुको मूल्य वृद्धि गरेको भन्दै जिल्ला प्रशासन कार्यालय गुल्मीले उक्त मूल्य वृद्धिमा रोक लगाएपछि गत छ दिन अघिदेखि आन्दोलनमा उत्रीएका मासु व्यवसायी संघले आजदेखि आफ्नो आन्दोलन फिर्ता लिएको छ ।
व्यसायीहरुले आफुखुसि एकाएक वृद्धि गरेको कुखुराको मासुको मूल्यमा प्रशासनले उक्त मूल्य समायोजन गरिदिएपछि व्यवसायीहरुले आफ्नो आन्दोलन फिर्ता लिएका हुन् । यस अघि मासु व्यवसायी संघले कुखुराको मासुको मूल्य रु २ सय ४० वाट वृद्धि गरि रु २ सय ८० रुपैंया कायम गरेको थियो तर उक्त मूल्य चर्को भएको र आफु खुसि वढाएको भन्दै उपभोक्ता समिति र होटल व्यवसायी मञ्च लगायतकासंघ संस्थाहरुले विरोध जनाएपछि उक्त मूल्यमा आज समायोजन गरिएको थियो । प्रशासनले रु २ सय ८० मूल्यलाई समायोजन गरि हाललाई रु २ सय ६० रुपैंयाँ प्रति केजी कुखुराको मासुको मूल्य कायम गरिदिएको छ । उक्त मूल्य अनुसार व्यवसायीहरुले किसानहरुलाई जिउँदो कुखुराको मूल्य रु १ सय ६० रुपैंया उपलव्ध गराउनु पर्ने र उपभोक्ताहरुलाई अनिवार्य रुपमा मासु विक्रि गर्दा छाला फालेको र गुणस्तर युक्त मासु विक्रि वितरण गर्नु पर्ने उल्लेख गरिएको छ ।
व्यवसायीहरुले जिल्ला प्रशासन कार्यालय र मासु व्यवसायी समितिसंग कुनै समन्वयनै नगरि संघले एकतर्फि ढंगले विना आधार मूल्य वृद्धि गरेको भन्दै प्रशासनले मासुको मूल्य वृद्धिमा केही समयकोलागि रोक लगाएको थियो । वजार अनुगमन समितिका संयोजक सहायक प्रमुख जिल्ला अधिकारी वावुराम अर्यालको अध्यक्षतामा आज जिल्ला प्रशासन कार्यालयमा मासु व्यवसायी समिति र मासु व्यवसायी संघ लगायतको रोहवरमा उक्त निर्णय गरिएको होटल व्यवसायी मञ्चका अध्यक्ष युवराज भण्डारीले जानकारी दिनु भएको छ । तर खसी र रागापाडाको मासुको मूल्य भने यथावत नै कायम गरिएको छ ।