प्रेम सनार
गुल्मी, असौज १३ । सरकार र उसको प्रशासनिक निकाय आफुलाई जनमुखी बनाउन अभियानका रुपमा जुटिरहेका बेला नेपाली काँग्रेस गुल्मी क्षेत्र नं ३ ले भने थप जनमुखी बनाउन भन्दै सदरमुकाममा सम्पर्क कार्यालय खोलेको छ ।
“तपाइको समस्या हाम्रो समस्या, तिनको समाधान हाम्रो अभियान ” भन्ने मूल नाराका साथ काँग्रेसले तमघासको उदिनढुंङ्गामा ३ नं क्षेत्रिय सम्पर्क कार्यालय खोलेको हो । उसले गाउँबाट आउने सर्व साधरणलाई सरकारी निकायको नियमित सेवा सहजढंगबाट दिलाउन सम्पर्क कार्यालय खोलेको जनाएको छ । कार्यालयको उद्घाटन गर्दै प्रमुख अतिथि नेपाली काँग्रेसका नेता प्रेमनाथ अर्यालले काँग्रेसजन र ३ नं क्षेत्रका मात्रै नभएर सबै क्षेत्रका जनतालाई प्रशासनिक सेवा र प्राप्त अधिकार दिलाउन सम्पर्क कार्यालयले महत्वपूर्ण भूमिका निर्वाह गर्ने बताए । कार्यक्रमका विशेष अतिथि प्रमुख जिल्ला अधिकारी कविन्द्र नेपालले प्रशासनले नै जनतालाई सु–सूचित गर्दै नागरिक बडा पत्रमा उल्लेखित सेवा प्रदान गर्न दत्तचित्त भैरहेको बेला यसरी सम्पर्क कार्यालय खोल्दा आफुहरुलाई सघाउ पुग्ने धारणा राखे ।
नागरिकहरुलाई दिने सेवाका बारेमा हरेक कार्यालयको एकिकृत बडापत्र प्रशासनले दशैँ वा तिहारसम्ममा निकाल्न लागेको जानकारी समेत उनले गराए । क्षेत्रिय सभापति दामोदर भुषालले गाउँका सर्वसाधारण जनता कुरा नबुझेर गाउँमै मिल्ने कुरा सदरमुकाम लिएर आएको र नागरिकता लगाएतका प्रशासनिक काममा दुई दिनसम्म बस्नुपरेको यथार्थलाई ह«दयाङ्गमन गरी सम्पर्क कार्यालय खोलिएको बताए । उनले “बदलौ आनी बानी, बनाऔं घर–घरमा करेसाबारी स्वावलम्वी बन्दछ जीवन सदावाहार हुन्छ घरबारी” भन्ने नारालाई समेत क्षेत्र नं ३ को काँग्रेसले मुर्तरुप दिन लागि परेको जानकारी गराए । देशमा प्रजातन्त्र नभएको र प्रशासनिक निकायमा नागरिक सर्वच्चोता नभएको आरोप समेत उनले लगाए । क्षेत्र नं ३ घर भई तमघासमा शिक्षण पेशा , अन्य पेशा व्यवसाय गरेर बसेका काँग्रेस कार्यकर्ताहरुले भदौ १६ गते तमघासको साखिने डाडाँमा बनभोजका क्रममा ३६ हजार रुपैयाँ संकलन गरी सम्पर्क कार्यालय खोलेका हुन् ।
सिर्जनशील कार्यका रुपमा लिइएको सम्पर्क कार्यालयमा विभिन्न नारा समेत टाँसिएको छ । कार्यक्रममा स्थानीय विकास अधिकारी हरिप्रसाद ज्ञवाली , कालिदत्त गुल्मका गुल्मपति सेनानी मनोजकुमार थापा , निमित्त जिल्ला प्रहरी प्रमुख जितेन्द्रकुमार बस्नेत ,जिल्ला स्वास्थ्य प्रमुख डा.हरिबहादुर के.सी.निमित्त जिल्ला बन अधिकृत कर्णबहादुर पाण्डे लगाएत विभिन्न कार्यालयका प्रमुख प्रतिनिधि थिए ।
त्यस्तै रेसुङ्गा बहुमुखी क्याम्पसका क्याम्पस प्रमुख चन्द्रकान्त पन्थी , सहायक प्रमुख विष्णुकान्त पन्थी , अर्जन आवसिय उच्च मा.वि. तमघासका प्रिन्सिपल दानबहादुर के.सी. ,गुल्मी उद्योग बाणिज्य संघका महासचिव कृष्णप्रसाद पोखरेल , दरुणदल गुल्मीका अध्यक्ष खिलध्वज पन्थी नेपाली काँग्रेस तमघास गाउँ कार्यसमितिका सभापति अखिलेश्वर प्रसाद पाण्डे ,लगाएतको आथित्यता थियो । क्षेत्रिय सभापति भुषालको सभापतित्वमा सम्पन्न कार्यक्रमको सञ्चालन सम्पर्क समितिका सचिव भगवत खड्काले गरेका थिए ।