गणेश लम्साल/नयाँ पत्रिका
विराटनगर, १९ फागुन
गाउँमा राति हिँडडुल गरेर सामाजिक विकृति ल्याएको 'अभियोग' लगाउँदै स्थानीय केही युवाले मोरङ मधुमल्लाका तीन किशोरीलाई मोसो र जुत्ताको माला लगाएर गाउँ डुलाएका छन् । आरोप लगाउने, अनुसन्धान गर्ने र फैसला सुनाउने युवालाई स्थानीय समाजले पनि साथ दिएको थियो ।
मोरङको मधुमल्ला- ३ र छिमेकी गाविस इलामको साक्फारा- २ का सीता विश्वकर्मा, गीता साम्पाङ र रीता राई -थर मात्र वास्तविक) गत सोमबार साथीको बिहेमा भेला भएका थिए । उनीहरू साथीको बिहेमा रमाएर राति सीताको घर फर्केर सँगै सुतेका थिए ।
स्थानीय गीताञ्जली निमावि कक्षा सातमा पढ्ने सीता बिहानै विद्यालय गएकी थिइन् । तर, उनलाई स्थानीय तीन युवा रमेश बोहोरा, अशोक साम्पाङ र टंक श्रेष्ठले नियन्त्रणमा लिएका थिए । १४, १६ र १७ वर्षका ती युवतीलाई नियन्त्रणमा लिने युवाहरू ३०-३५ वर्षका हुन् ।
सीतालाई समातेर उनीहरूले तिम्रा साथी कहाँ छन् भन्दै केरकार गरेका थिए । सीतालाई जबर्जस्ती घरमा ल्याएपछि उनका दुई साथीलाई पनि उनीहरूले नियन्त्रणमा लिएर स्थानीय चोकमा पुर्‍याएका थिए । त्यतिन्जेलसम्म स्थानीय दुई विद्यालका सारा विद्यार्थी जम्मा भइसकेका थिए ।
सारा विद्यार्थी र समाजका सामु तीन युवाले ती किशोरी छाडा भएको र उनीहरूले समाज बिगार्न सक्ने भएकाले दण्डित गर्नुपर्ने निष्कर्ष सुनाएका थिए । 'हामीले केही गल्ती गरेका छैनौँ, साथीको बिहेमा गएका हौँ, हाम्रो बेइज्जत नगरिदिनोस् भन्दै केटीहरू रोइरहेका थिए, तर ती दानवजस्ता केटाहरू किशोरीहरूलाई चरित्रहीन भन्दै गाली गरिरहेका थिए,' स्थानीय गोपाल नेपालीले भने । उनका अनुसार किशोरीहरूले बिन्ती गरिरहेका थिए, तर न कसैले उनीहरूको वास्तविक गल्ती के हो भनेर सोध्यो न कसैले अमानवीय काम गर्नबाट ती युवालाई रोक्यो ।
करिब हजारको भीडबीच रोइरहेका किशोरीलाई तीन युवाले मोसो लगाए, जुत्ताचप्पलको माला लगाइदिए । अनि दर्शक सबैलाई ताली पिट्न भने, भीडले ताली पनि बजायो । तालीबीच तीन किशोरीलाई गाली-बेइज्जती गर्दै स्थानीय चोकचोक पनि घुमाइयो ।
अमानवीय यातना सहेका किशोरी विक्षिप्त छन् । आफन्तको सहयोगमा उनले स्थानीय मधुमल्ला प्रहरीचौकीमा उजुरी दिएका थिए । प्रहरीले उनीहरूलाई पक्राउ गरिसकेको छ । तर, उजुरी फिर्ता नलिए ज्यान मार्ने धम्की दिएका थिए, तर पीडित पक्ष दोषीलाई कारबाही गराएरै छाड्ने मनस्थितिमा पुगेको छ ।
मधुमल्ला प्रहरीचौकीका असइ ईश्वर कार्कीका अनुसार तीन युवाले विद्यार्थी र समाज भेला गरेर तीन किशोरीको बेइज्जत गरेको पुष्टि भएको छ । उनले पक्राउ परेका तीन युवालाई इलाका प्रहरी कार्यालय उर्लाबारी चलान गरिएको बताए ।
इलाका प्रहरी कार्यालय उर्लाबारीका प्रहरी निरीक्षक ढुण्डी न्यौपानेले मोसो दलेर यातना दिनेहरूलाई गम्भीर अपराधअन्तर्गत कारबाही चलाउने बताए । 'प्रमाण लगभग जुटिसकेको छ, उनीहरूमाथि सख्त कारबाही हुन्छ,' उनले भने ।
नयाँ पत्रीकाबाट