प्रेम सुनार

गुल्मी, २४ पुस । गता मंगलबार "कार्यालयमा हैन घाम ताप्ने ठाउँमा भेटिन्छन् जिबिस कर्मचारी, एकचोटीको मासुचिउरा नास्ताको बिल झन्डै ७० हजार रुपैँया" शीर्षकको समाचार गुल्मीन्युज डट कममा प्रकाशित भएपछी बुधबार भने दिनभरी जसो कर्मचारीहरु कार्यालयमै देखिएका हुन् । बुधबार कार्यालय समयभित्रै कार्यालयमा पुगेका उनीहरु कुनै पनि फाँट रीत्तो पारेर बाहिर निस्किएनन् । काम परेपनि पालैपालो बाहिर निस्केका उनीहरु कर्मचारीको नियममा बसेको सेवाग्रहीहरुले बताए ।

तर एक दिनमै झण्डै ७० हजार खाजा खर्चको विल होटलहरुलाई बनाउन दवाव दिएको खवरले भने जिविस भित्र बबाल मच्चिएको र सर्बसाधारण सम्म त्यस विरुद्ध आवाज उठेको छ । एकै दिनमा कसरी त्यती धेरै रकम खाजामा खर्च भयो ? यस्तो प्रश्न उठाउँदै सरोकारवाला संघ संस्थाले छानविन हुनुपर्ने माग गरेका छन् । सुशासन अभियान गुल्मीले समेत त्यो विषय गम्भिर भएकोले यसमा छानविन हुनुपर्ने माग गरेको छ ।

जिल्ला विकास समिति गुल्मीमा मिति २०६९ बैशाख ७ गते रु एक सयका दरले मासु चिउरा ५ सय ८४ जनालाई,  ३५ का दरले कोक १ सय ६ जनालाई, फलफुल ३८ का दरले सय जनालाई, मिति बैशाख १५ गते मासु रु १ सयका दरले चिउरा ४ सय ३७ जनालाई, जेठ ९ गते मासु चिउरा रु १ सयका दरले ६ सय ९४ जनालाई, जेठ १६ गते मासु चिउरा ४ सय ११ जनालाई र सो को भोलिपल्ट सयका दरले मासु चिउरा ६ सय ९४ जनालाई खुवाएको भन्दै एक व्यावसायीलाई विल बनाउन जिविसका एक कर्मचारीले लगाएका विषयमा छानविन हुनुपर्ने माग सरोकारवाला संघ संस्थाले गरेका हुन् । उक्त विलअनुसार  बैशाखको २ दिनमा मात्रै १ लाख ९ हजार ६ सय १० रुपैयाँको खाजाखर्चको विल जिविसले बनाएको छ । त्यस्तै जेठ महिनामा मात्रै तीन दिनमा १ लाख ७९ हजार ७ सय रुपैयाँको विल बनाउन लागाएको भेटिएको छ ।

यो २ महिनाको अवधिमा खाजाको विल मात्रै २ लाख ७९ हजार ३ सय रुपैयाँ खर्च भएको विल बनाईएको छ । जिल्ला विकास समितिमा त्यस वर्ष यती धेरैले खाजा खानेगरी कुनै कार्यक्रम नभएको त्यहीभित्रका एक कर्मचारीले बताए ।